Rrogat e ulëta dhe kushtet e këqija i detyrojnë shumë infermierë nga Ballkani Perëndimor të largohen drejt Gjermanisë, atje ku nevojiten ende 50 mijë deri në 100 mijë forca punëtore në sektorin e shëndetësisë.
Serbia është një prej vendeve, së bashku me Shqipërinë, nga ku largohen më së shumti infermierë dhe mjekë drejt Gjermanisë.
Në bazë të një projekti të Shoqërisë Gjermane për Bashkëpunimin Ndërkombëtar, GIZ, dhe Agjencisë Federale të Punës, BA, “Triple Win-Projekt” janë bërë marrëveshje me Serbinë, Bosnjen, Tunizinë dhe Filipinet për marrjen e infermierëve.
Por ky largim masiv i njerëzve të mjekësië po krijon me shpejtësi probleme në vendet e Ballkanit. Ndryshe nga Shqipëria ku largimi i mjekëve dhe infermierëve konsiderohet normal nga ministrja e Shëndetësisë, Serbia është zgjuar dhe ka filluar të marrë masa për emigrimin masiv.
Serbia ka vendosur që të pezullojë marrëveshjen me Gjermaninë për dërgimin e infermierëve dhe vitin e ardhshëm, sipas ministrit serb të Shëndetësisë, Zoran Gjordjevic, marrëveshja mund të anulohet tërësisht.
Menjëherë pas këtij lajmi është rikthyer në vëmendje edhe një intervistë e presidentit serb, Aleksandar Vuçiç e dhënë në fund të 2019-ës, ku tregonte për takimin që kishte zhvilluar me ministrin gjerman të Shëndetësisë, Jens Spahn
“Ai thotë: Unë vij në Serbi dhe ju marr infermieret tuaja. Ia kam thënë në fytyrë, nuk dua që të vish në Serbi dhe të marrësh infermieret e mia. Të vlerësoj, je një ministër i shkëlqyer. Ke sistemin shëndetësor më të mirë në botë. Por mos hajde në Serbi”, ishte shprehur Vuçiç.
Vetë ministri gjerman i Shëndetësisë, Jens Spahn ka reaguar të enjten ndaj deklaratës së Vuçiçit. Sipas “Frankfurter Allgemeine Zeitung” Spahn i ka hedhur poshtë akuzat e Vuçiçit, që me gjasë i është referuar Spahn me fjalët, ai do të “marrë” infermiere atje. Spahn është përgjigjur, se lexoj “sot për biseda me të, që unë nuk i kam zhvilluar kurrë në këtë formë.”
E ndërkohë që Serbia ka filluar të reagojë dhe të mbrojë veten nga largimi i pafundëm i njerëzve të kualifikuar, në Shqipëri nuk vihet re asnjë lëvizje, përkundrazi, vala e largimit po konsiderohet një trend normal.
