Ka shkuar në katër numri i viktimave si pasojë e shpërthimit të bombolës së gazit në fshatin Rramanli të Kumanovës, në Maqedoninë e Veriut. Një burrë i moshës 58 vjeç ka ndërruar jetë disa orë pas ngjarjes, si pasojë e djegieve të shumta që kishte marrë.
Në familjen Alimi shpërthimi i bombolës i mori jetën menjëherë në mënyrë tragjike tre fëmijëve të moshës 8, 9 dhe 11 vjeç, ndërsa familjarët e tjerë mbetën të plagosur.
Në gjendje të rëndë për jetën vijojnë të jenë dy gra të moshës 30 dhe 50 vjeç, si dhe një burrë i moshuar. Ata ndodhen nën kujdesin intensiv të mjekëve në spitalin e Shkupit.
Në spital ndodhen edhe tre persona të tjerë, midis tyre një fëmijë dhe një grua shtatzënë, të cilët paraqiten në gjendje të qëndrueshme.
Mediat vendase kanë publikuar pamje nga brenda banesës ku ndodhi tragjedia. Çdo gjë aty është e shkrumbuar. Dëshmitarët bëjnë me dije se shpërthimi i bombolës ka ndodhur teksa ishte duke u përgatitur mëngjesi.
Tragjedia në familjen Alimi konsiderohet më e madhja që mbahet mend në të gjithë zonën.
