“Vendimet do të merren hap pas hapi”. Kështu u përgjigj ministrja së Shëndetësisë Ogerta Manastirliu e pyetur nëse Shqipëria po planifikon të mbyllë kufinjtë me Italinë.
“Kjo situatë po trajtohet me shumë përgjegjësi nga qeveria shqiptare dhe të gjitha strukturat. Të veprojmë në përgjegjësi të plotë duke garantuar pikë së pari shëndetin e qytetarëve. Shëndeti publik është i pari për ne. Edhe vendimet tona të orientuara drejt mbrojtjes. Ajo çfarë do të bëjmë do të jetë sipas shkallës së rrezikshmërisë dhe do të marrim masat përkatëse. Unë e thashë se nuk ka asnjë rast të prekur nga coronavirusi.
Do ta vlerësojmë hap pas hapi edhe marrjen e masave dhe vendimeve të tjera. Për çdo masë që do të marrim do të informohemi në kohë reale. Ne si Shqipëri jemi duke u konsultuar me OBSH-në në raport me të gjitha masat që kemi marrë deri më tani. OBSH rekomandon që të vlerësohet mundësia hap pas hapi por mbyllja e kufinjve realizohet në një moment të caktuar ku paraqiten raste apo kur kemi një situatë epidemie apo një situatë me përhapje të gjerë” tha Manastirliu.
