Prokuroria e Tiranës ka nisur hetimet në lidhje me audion e shpërndarë në Whatsapp e një vajze, dje, sipas së cilës vjehrra e motrës së saj konfirmonte 12 raste në Shqipëri dhe se shteti e fsheh është e pavërtetë.
Në mbrëmje vajza kërkoi që mesazhi zanor të fshihej pasi, ishte i pa vërtet. Në mesazhin e dytë ajo shprehej se ishte thirrur për të dëshmuar në polici. Pak orë pasi qarkulloi audioja Ministria e Shëndetësisë ka konfirmuar se një informacion i tillë është falso, i cili është shpërndarë nga një person i paidentifikuar ende për motive të paqarta, dhe qetëson të gjithë qytetarët se do të jetë transparente me shifrat në rast se do të ketë persona të dyshuar.
NJOFTIM PËR SHTYP I PROKURORISË
Prokuroria Pranë Gjykatës së Shkallës së Parë, Tiranë, duke marrë shkas nga të dhënat e ndryshme të bëra publike në media si dhe përhapja e mesazheve nëpërmjet telefonit, në lidhje me informacione të dyshuara si të rreme mbi përhapjen e mundshme të Coronavirusit, në vendin tonë, filloi kryesisht hetimin për veprën penale të “Përhapja e informatave të rreme që ngjallin panik”, parashikuar nga neni 267 i Kodit Penal.
Objekti i hetimit lidhet me situatën e krijuar si rezultat i hapjes së informatave për të cilat dyshohen se janë të rreme, për shkak të natyrës sensitive që paraqet përhapja e këtyre informacioneve në masën e gjerë.
Duke treguar impenjimin maksimal të prokurorisë, në trajtimin e rasteve të tilla, sjellim në vëmendjen e qytetarëve se çdo përhapje e informatave apo njoftimeve të rreme, me fjalë, me shkrim, apo me çdo mënyrë tjetër, me qëllim që të ngjallë një gjendje pasigurie dhe paniku tek njerëzit është penalisht e dënueshme.
Vijojmë të ndjekim me interes të shtuar, çdo të dhënë në raport me rastin konkret, duke kërkuar mirëkuptimin dhe besimin e qytetarëve. Nga ana tjetër, mirëpresim çdo qytetar për informacionet që mundet të disponojnë.
