Alarmi nga koronavirusi bllokoi çdo aktivitet sporti në Itali, ndërsa në Romë është duke u zhvilluar një mbledhje urgjente mes Federatës së Futbollit të Italisë dhe qeverisë.
Gjatë ditës së djeshme u anuluan 4 ndeshje që do zhvilloheshin në kuadër të javës së 25-t të Serisë A dhe më tej kryeministri Giuseppe Conte nuk përjashtoi as mundësinë e pezullimit të javës së 26.
Sipas “Gazzetta Dello Sport”, federata i ka kërkuar autorizim qeverisë që ndeshjet e javës që vinë të zhvillohen me dyer të mbyllura, por kjo kërkesë do të shqyrtohet në vazhdim nga ekspertët.
Megjithatë po kjo media raporton se Juventusi nuk pranon të luajë në një stadium pa tifozë ndaj Interit dhe ndaj ka propozuar që sfida të zhvillohet në fushë neutrale, por me tifozët në krah.
Nga kjo mbledhje pritet që të vendosen edhe datat për ndeshjet e anuluara ditën e djeshme, nga ku takimi mes Interit dhe Sampdorias, flitet që do jetë data 20 maj, data e kësaj ndeshje. Një tjetër mundësi është të shtyhen gjysmëfinalet e Kupës së Italisë, si rrjedhojë edhe finalja nga 13 maj në 20 maj.
Ndeshjet e tjera ajo midis Atalanta-Sassuolo pritet të luhet në 18 mars, Torino-Parma, në 4 ose 11 mars dhe Verona-Cagliari në 11 mars. Megjithatë deri më tani asgjë nuk është zyrtare dhe pritet një konfirmim edhe nga qeveria./Fjala.al/
