Para pak vitesh në Elbasan nuk kishe asnjë problem për të parkuar makinën, por sot është totalisht kaos.
Më sa duket, në këtë qytet ka filluar të funksionojë vërtet ligji i xhunglës apo si njihet ndryshe i më të fortit. Nëse je i fortë e ke të garantuar vendin e parkimit.
Në redaksinë e Gazetës Fjala kanë ardhur disa denoncime se çfarë po ndodh me parkimet në këtë qytet.
Pikërisht, në bulevardin kryesor të qytetit, “të fortët” zënë me karrige dhe tavolina vendet e parkimit.
Dhe sikur të mos mjaftonte kjo, bashkia e këtij qyteti ka krijuar një korsi biçikletash duke ‘fshirë’ aktualisht shumë vende parkimi.
Krijimi i korsive të biçikletave është nismë që duhet vlerësuar, por jo kur bëhet e pastudiuar dhe pa zgjidhur më parë problemet e tjera me parkimin. A ishte vërtet e nevojshme gjithë kjo korsi e madhe në bulevardin kryesor të qytetit? A është bërë një studim se sa biçikleta kalojnë në ditë përgjatë bulevardit? Dhe pse kjo urgjencë për korsi biçikletash pa u zgjidhur problemi i parkingjeve? Këtyre pyetjeve mund t’u përgjigjet vetëm Bashkia e Elbasanit.
Aktualisht, Elbasani ka vetëm dy parkingje publike private, njëri përball stadiumit të qytetit, dhe tjetri përballë tregut të fruta-perimeve. Parkingje që nuk përmbushin aspak nevojat e qytetarëve.
Prej vitesh në Elbasan ka pasur fjalë se bashkia e atij qyteti është një kopjuese e keqe ndaj risive që sjell kryeqyteti i shqiptarëve. Rasti më i fundit është korsia e biçikletave në qendër të qytetit.
Bashkia duhet t’i japë me patjetër zgjidhje parkingjeve. Gjithashtu, të bëjë studime me specialistët e saj se cilat janë rrugët e përshtatshme se ku mund të krijohen hapësirat për korsitë e biçikletave.
Policia Bashkiake por dhe ajo e Shtetit nuk duhet të mbyllin sytë para “të fortëve” që zaptojnë parkingjet publike dhe jo vetëm. /Fjala.al
