Ambasadori i OSBE-së Bernd Borchardt është shprehur se Shqipëria mund të shkojë drejt një qeverie teknike për të zgjidhur krizën politike në vend, veçanërisht në përplasjen mes mazhorancës dhe presidentit Ilir Meta.
Duke vlerësuar dialogun midis mazhorancës dhe opozitës për reformën zgjedhore, ambasadori i OSBE-së, thekson se Shqipëria mund të shkojë drejt një qeverie transitore para zgjedhjeve të përgjithshme, ndërsa këtë vendim duhet ta marrë politika shqiptare sipas tij.
Ambasadori ka dalë hapur duke thënë në një intervistë për News 24, duke thënë se është për listat e hapura ndërsa shton se partitë politike duhet të zgjedhin kandidatë të pastër, të mos kenë asnjë të shkuar kriminale, ndërsa administrata duhet të jetë tërësisht e papolitizuar.
“Së pari, hapi më i mirë për të rikthyer besimin te kandidatët do të ishte që partitë të paraqisnin kandidatë të pastër. Ligji i ashtuquajtur i dekriminalizimit u lejon partive që të kontrollojnë kandidatët e tyre të mundshëm, përmes prokurorisë, shumë përpara zgjedhjeve. Aspekti i dytë është se, sigurisht, duhet të trajtohen krimet elektorale. Merrni shembullin e presionit ndaj administratës publike: ODIHR-i rekomandoi fuqishëm krijimin e një strukture të pavarur për të trajtuar pretendimet e presionit mbi administratën dhe abuzimin me burimet publike në procesin zgjedhor. Reforma zgjedhore mund ta krijojë një strukturë të tillë, si edhe një procedurë me të cilën punonjësit e administratës mund të denoncojnë çdo presion politik ose abuzim të burimeve. Këta denoncues duhet të gëzojnë më pas statusin e një sinjalizuesi”, tha ambasadori.
