Ndalohet nga policia në orët e para të mëngjesit botuesi Henri Çili. Ndalimi i tij është bërë për llogari të Gjykatës së Gjirokastrës dhe prokurorisë së Përmetit.
Ndërsa dyshohet se urdhër-arresti është lëshuar për shkak të një kallëzimi për ndërhyrje tek një gjyqtar për lirimin e një të burgosuri, identiteti i të cilit ende nuk dihet.
Bashkë me Henri Çilin janë arrestuar edhe 12 persona të tjerë. Sipas informacioneve të para, të arrestuarit do të ndikonin tek gjyqtarët për të liruar anëtarët e bandës së Lazaratit. Një nga të ndaluarit është edhe drejtori juridik në Universitetin Europian të Tiranës, Ilir Korbi.
Të 12 të arrestuarit akuzohen për korrupsion pasiv dhe aktiv në fushën e drejtësisë, ndërsa hetimi ka nisur që shtatorin e vitit 2019.
Henri Çili njihet si pronar i Universitetit Europian të Tiranës dhe botues i gazetës ‘Liberale’.
Forca të shumta policore kanë bërë rrethimin e Universitetit Evropian të Tiranës, ku janë zhvilluar kontrolle përgjatë natës. Megjithatë, pritet një konfirmim zyrtar nga policia.
