Një operacion i policisë i cili ka nisur që prej orës 5 të mëngjesit po vijon të zhvillohet në Lazarat.
Tre grupe efektivësh të policisë së Gjirokastrës, kanë zhvilluar kontrolle në banesat e fshatit të Lazaratit.
Në një nga këto banesa, konkretisht, atë të Amarildo Alikos,( i afërmi i ish-kryetarit të komunës së Lazaratit, Dash Aliko) i cili është arrestuar policia, pasi në banesën e tij janë gjetur tre armë automatikë model 56 ( kallash), një granatë, një pushke 20-she e mijëra fishekë deri tani.
Ndërhyrja e sotme e policisë të kujton atë të vitit 2014, kur forcat RENEA, hynë në Lazarat duke u përballur me një operacion të vështirë për të asgjësuar lëndën narkotike, hashash, dhe kapjen e personave me precedent penalë.
Policia hasi në rezistencë në atë kohë ku humbi jetën edhe një prej efektivëve të RENEA-s, Ibrahim Basha.
