Janë mbyllur tre ndeshjet e orës 14:00 të Superligës të vlefshme për javën e 24-t të këtij kampionati dhe ndër to Skënderbeu dhe Laçi ia kanë dalë të marrin 3 pikëshin.
Bylis-Flamurtari, Vllaznia-Skënderbeu dhe Luftëtari-Laçi ishin tre takimet që u mbajtën në këtë orë.
Takimi Bylisi-Flamurtari u mbyll me barazimin e pastër 0-0, duke u ndarë në paqe dhe marrë të dyja nga 1 pikë për këtë javë.
Skënderbeu ia ka dalë të marrë 3 pikë nga ndeshja me Vllazninë me anë të golit të Blerim Krasniqit në minutat shtesë të lojës, duke kaluar në vend të 7 e në të njëjtën kohë duke zbritur Vllazninë në vend të 8 të Kategorisë Superiore.
Takimi Luftëtari-Laçi u mbyll me triumfin e kurbinasve me rezultatin 0-2. Laçianët shënuan golin e tyre të parë në minutën e 65-t të lojës duke zhbllokuar rezultatin me anë të golit të Kyrian Nwabueze dhe më pas goli i dytë u shënua në minutën e 88-ë të lojës nga Redon Xhixha, duke kaluar kështu në vendin e 3-ë të kategorisë.
Ndërkohë në orën 17:00 do të luhet një tjetër takim i rëndësishëm ai midis Teutës dhe Kukësit, ndërsa duhet theksuar se verilindorët do mundohen me gjithçka për të qëndruar në garën për titull.
Rikujtojmë se mbrëmjen e djeshme u luajt derbi për takimin e javës së 24-t dhe Tirana mundi skuadrën e Partizanit me rezultatin e thellë 5-1, nga ku siguroi koma më shumë pozitat e saj si kryesuese e Superiores./Fjala.al/Katerina Tafa/
