Në momentet e fundit para se të fillonte seanca është ndërruar gjyqtari për seancën ndaj 30 të arrestuarve në operacionin “Mezhgorani”, mes të cilëve edhe Henri Çili.
Seancën do ta drejtojë Dritan Hasani, ndërsa gjyqtarja Yrvete Shkreli është përjashtuar dje. Ishte një kërkesë e prokurorit Asllan Bajrami, që është pranuar nga kryetarja e gjykatës.
Ai kërkoi përjashtimin e gjyqtares Yrvete Shkreli, pasi dyshohet se kanë pasur përplasje mes tyre për caktimin e masës së sigurisë mes ditës së diel apo të hënë. Gjyqtarja kërkonte që seanca të mbahej të hënën, dhe jo sot.
Ndërkaq, bashkëpunëtorë, kolegë dhe mbështetësit e botuesit Henri Çili kanë qenë të pranishëm para Gjykatës së Faktit në Përmet në mbështetje të tij.
Të pranishëm ishin Preç Zogaj, Roland Lami, Arjon Sulo dhe ish-kryekomunari i Shëngjinit Salvador Kaçaj.
