Kreu i Partisë Demokratike, Lulzim Basha i është bashkuar protestës që ka nisur në bulevardin “Dëshmorët e Kombit”. Protesta është thirrur nga presidenti Ilir Meta, por kryeopozitari Basha i ka dhënë mbështetje.
“Mesazhi është falënderim nga zemra për të gjithë qytetarët që i janë përgjigjur thirrjes për të mbrojtur Kushtetutën. E vetmja garanci për lirinë është mbrojtja e Kushtetutës”, tha Basha në protestë.
Edhe ish-kryeministri Sali Berisha është parë në protestë. Ai deklaroi shkurtimisht për mediat: “Ky miting shënon fillimin e fundit të narko-shtetit”.
Vetë presidenti Meta nuk është shfaqur ende në protestë. Ai akuzon mazhorancën e drejtuar nga kryeministri Edi Rama se po realizon një “grusht shteti” duke tentuar të kapë Gjykatën Kushtetuese.
