Një shqiptar është kthyer në heroin e italianëve pasi ai ka ndihmuar qytetarët në një hotel në Alassio, i cili është kthyer në një karantinë, pasi një kliente 72-vjeçare rezultoi pozitive me koronavirus.
Autoritetet vendosën ta kthenin hotelin në karantinë, nga frika e përhapjes së koronavirusit.
Albi Albino ka treguar përjetimet e tij gjatë qëndrimit në hotelin karantinë.
“Dy ditët e para ka qenë një tmerr. Kur na thanë që askush nuk duhet të dalë nga hoteli na erdhi një ankth shumë i madh sepse shumica ishin në moshën mbi 70-vjeç. Gjëja e parë që mendova ishte t’i vija në ndihmë personave që ndodheshin këtu dhe bashkë me vëllain tim që punon këtu edhe me kolegët e tjerë edhe pse kur erdhi njoftimi ne nuk ishim punëtorë, por si të gjithë të tjerët që duhet të rrinin nëpër dhomat e tyre. Unë nuk e mora me frikë, nuk mendova asgjë, doja vetëm t’i ndihmoja ata që të ndiheshin mirë sikur nuk kishte ndodhur asgjë.”, tha ai në emisionin “Ditë e re”.
I riu tregon se ai i është nënshtruar testit për koronavirus, por ka rezultuar negativ. “Tamponin e parë që bëra më doli negativ dhe isha personi i vetëm që më doli negativ, shumica ishin pozitivë por pa asnjë simptomë. Shqiptarët imunitet? Nuk e di, thjesht është një situatë tragjike, por është thjesht një grip i ri që ka dalë dhe me imunitetin e fortë mund ta përballosh këtë lloj gripi.
Solidariteti i tij ka tërhequr vëmendjen e politikanëve italianë, e madje duan ta shpërblejnë për gjestin e bërë.
“Kam folur në telefon me Giovani Totin, më ka marrë ai vetë në telefon i cili më tha që je duke bërë diçka që shumë veta nuk do e bënin edhe për këtë është mirënjohës edhe më ka premtuar që do marr nënshtetësinë italiane.”
