Nga Mitro Çela
Era Istrefi mori pjesë në mbylljen e Kampionatit Botëror të futbollit “Rusi 2018”. Ndërsa lajmi po jepej në televizor, unë bluaja kujtime.
Fund nëntori 2016. Eri, nëndrejtori i Top Channel – it u fut në zyrën e Filip Çakulit.
– Ke miqësi me Presidentin Bujar Nishanin?
– Problemi?
– Njoh Era Istrefin dhe producentin e saj, Fatonin. Duan pasaporta shqiptare. Ndërhyn dot te Presidenti?
– Me ndërhyrjet “Fiks Fare” ka specializuar Mitron.
Dy ditë më vonë. Në zyrën e Presidentit. U futa drejt e në temë:
– Zoti President! Na duhen dy pasaporta. Pa letra. Për Era Istrefin dhe producentin e saj.
– Ka dalë një problem, – tha Presidenti. – Unë kisha vendosur të lehtësoja procedurat për personalitetet nga Kosova. Me këtë rast morën pasaporta shqiptare edhe dy deputetë të Vetëvendosjes. Pasi doli dekreti, mora një notë proteste nga Kryeministri i Kosovës: “Zoti President! Në emër të qeverisë ju kërkojmë të zbatoni procedurat për dhënien e pasaportave”.
Morali? Era Istrefi duhet t’i marrë dorën ministrisë së Kulturës në Kosovë. Pastaj derë më derë dhe pasaporta kërkon më shumë se një vit që të piqet.
– Për inat të sime vjehrre… – thashë unë. – Ka derman?
– Të marrin një kërkesë në Kosovë, pastaj së bashku do t’i djegim etapat, – qeshi Presidenti.
– Pse së bashku?
– Ti do të ndërhysh në ministrinë e Brendshme dhe në SHISH…
20 shkurt 2017. Mesazh nga Presidenti:
– Mitro! E firmosa dekretin. Nr. 10003. T’i gëzojnë pasaportat.
Mora në telefon Fatonin. Erdhi në Tiranë së bashku me Erën. Pasi fola me Genc Gjonçaj, sekretar i Përgjithshëm në ministrinë e Brendshme, të tre ngjitëm shkallët në ish godinën e “ZP” – së. Shtyva derën e zyrës së Gjendjes Civile. Shefja sa nuk ulëriti:
– Uaa! Era… Vajza ime të ka idhull… Bëjmë një foto?… Do të çmendet vajza!
Pastaj Erën kush ta rrëmbente më parë për selfie… Edhe rrugëve… Të tre përfunduam në rajonin e policisë për dokumentet. Përsëri:
– Uaa Era!…
Përsëri selfie… Era ishte e lumtur. Unë e pyeta:
– Era! Pse të duhet pasaporta?
