Kancelarja gjermane Angela Merkel dhe presidenti i Francës Emanuel Macron kanë filluar të bëjnë lëvizjet e para për të rinisur dialogun mes Prishtinës dhe Beogradit.
Sipas gazetës serbe ‘Blic’, Gjermania dhe Franca po bashkërendojnë ngushtë për përgatitjet e Samitit të Parisit, i cili do të jetë një lloj vazhdimi i takimit i cili u mbajt në Berlin vitin e kaluar.
Nga ana tjetër, Brukseli ka theksuar se samiti i ri “do të ketë diskutime mbi hapat e nevojshëm për të krijuar marrëveshje” midis Beogradit dhe Prishtinës.
Ndërkaq, Shtetet e Bashkuara të Amerikës dhe Serbia refuzuan propozimin e Albin Kurtit për heqjen e taksës më 1 prill me kushte të caktuara.
Sipas ‘Blicit’ në qoftë se taksa hiqet më menjëherë mbledhja e zyrtarëve nga Prishtina dhe Beogradi në një tryezë nuk do të jetë e largët.
Këtë e ka bërë të ditur edhe presidenti francez, Emanuel Macron i cili i ka sugjeruar Kurtit që së pari të heqë plotësisht tarifat.
“Gjermania mbështet plotësisht vazhdimin e shpejtë të dialogut të udhëhequr nga BE-ja për normalizimin e marrëdhënieve Serbi-Kosovë, nën kujdesin e përfaqësuesit të Lartë të BE-së, Joseph Borel se ndërmjetësues. Në këtë kontekst, Franca dhe Gjermania po bashkërendojnë ngushtë për vazhdimin e takimit të mbajtur më 29 prill 2019 në Berlin”, kanë thënë për gazetën serbe nga zyra e Merkelit.
Ditën e djeshme u zhvillua një takim mes presidentit kosovar, Hashim Thaçi dhe atij serb, Aleksandar Vuçiç në Shtëpinë e Bardhë.
Vuçiç kërkoi heqjen e taksës për të vazhduar dialogun me Kosovën, ndërsa i ka bërë thirrje përfaqësuesve të Kosovës të mos kërkojnë njohjen e Kosovës nga Serbia pasi sipas tij, kjo vetëm se e përkeqëson situatën.
Nga ana tjetër, Thaçi nuk ka treguar se çfarë është diskutuar në këtë takim, por ka thënë se ditët në vazhdim do të raportojë në Kuvendin e Kosovës dhe para qytetarëve.
