Koronavirusi ka hyrë në vendin tonë dhe menjëherë është ngritur një gjendje alarmi te shumë njerëz. Por studimet të kryera kryesisht në Kinë, ku është edhe vatra kryesore, tregojnë arsyet përse nuk duhet të jemi në panik nga virusi i ri.
Sipas të dhënave, koronavirusi pothuajse nuk i prek fëmijët nga 0-9 vjeç dhe ky është një lajm i mirë për prindërit, të cilët janë të parët që shqetësohen në të tilla situata. Vetëm 0.9% e rasteve të studiuara në Kinë i përkasin kësaj grupmoshe, por mos të harrojmë se përhapja e virusit atje është shumë e madhe.
Edhe për moshën 10-19 vjeç ka një risk shumë të vogël për infektim, ku vetëm 1-2% e rasteve i përkasin kësaj grupmoshe.
Shifra rritet te grupmoshat 20-29 për të arritur maksimumin në grupmoshën 50-59 vjeç, që ka edhe rastet më të shumta të infektimit.
Por edhe nëse infektohesh me coronavirus kjo nuk do të thotë se të rrezikohet jeta, të paktën për të rinjtë. Deri më tani nuk është regjistruar asnjë viktimë që i përket moshës 0-9 vjeç dhe shifra është shumë e ulët deri në moshën 39 vjeç. Pra të rinjtë arrijnë që ta përballojnë virusin pa patur raste të shpeshta vdekjesh.
Situata bëhet problematike për personat e moshës mbi 70 vjeç. Ajo që vihet re është se personat e kësaj grupmoshe janë tepër të rrezikuar nga koronavirusi. Edhe numri më i madh vdekjeve i përket kësaj kategorie.
Në shumicën e rasteve viktimat janë të moshuar dhe që kanë patur probleme të tjera shëndetësore.
Higjena personale është shumë e rëndësishme në të tilla raste. Njerëzit duhet të lajnë sa më shpesh duart dhe të shmangin grumbullimet e mëdha. Personat e moshuar duhet të shmangin daljet dhe të qëndrojnë kryesisht në shtëpi.
