Përveç Ministrisë së Shëndetësisë, e cila ka ngritur task-forcën për përballimin e situatës emergjente të krijuar nga koronavirusi në Shqipëri, veçanërisht pas ditës së sotme ku dy persona rezultuan pozitivë, edhe Ilir Meta ka ngritur task-forcën e tij.
Përmes zëdhënësit të tij, Tedi Blushi, kreu i shtetit ka bërë të ditur ngritjen e task-forcës nën drejtimin e Këshilltarit për Sigurinë Kombëtare, Bahri Shaqiri.
Sipas Presidencës, task-forca do të bëjë të mundur bashkërendimin me të gjitha strukturat shtetërore, monitorimin në terren, nxitjen dhe marrjen e të gjithë masave institucionale për përballimin e kësaj pandemie.
Ilir Meta fton të gjithë qytetarët që të kontaktojnë presidencën nëse nuk marrin trajtimin e duhur mjekësor.
“Në kuadër të përballimit dhe tejkalimit me pasoja sa më të lehta të pandemisë së coronavirusit që ka prekur vendin tonë, duke patur prioritet absolut shëndetin e çdo qytetari të Republikës së Shqipërisë, në institucionin e Presidentit të Republikës është ngritur një Task Force, nën drejtimin e Këshilltarit për Sigurinë Kombëtare z.Bahri Shaqiri, me qëllim: Bashkërendimin me të gjitha strukturat shtetërore; monitorimin në terren, nxitjen dhe marrjen e të gjithë masave institucionale për përballimin e kësaj pandemie; Aktivizimin dhe afrimin e të gjitha mundësive, kapaciteteve dhe forcave të kualifikuara njerëzore dhe shkencore, shumë të nevojshme. Ftojmë të gjithë qytetarët të cilët kanë shqetësime, nuk marrin trajtimin e duhur mjekësor, nuk u kushtohet vëmendja e duhur dhe konstatojnë nënvlerësime në marrjen e masave të domosdoshme, të na kontatojë pa hezitim në adresën e email të vendosur në dispozicion: taskforce@president.al, si dhe në dy numrat celularë: +355693435861, +355693354269”, shkruan në Facebook, zëdhënësi i Presidentit, Ilir Meta.
