Kryeministri i Kosovës, Albin Kurti, do të takohet sot me këshilltarët kryesorë të kancelares gjermane, Angela Merkel dhe presidentit francez, Emmanuel Macron.
Zyra për Informim e Kryeministrit ka njoftuar se në orën 09:00 pret në takim një delegacion franko-gjerman, i përbërë nga Jan Hecker dhe Emmanuel Bonne – këshilltarët kryesorë të kancelares gjermane Angela Merkel dhe presidentit francez Emmanuel Macron.
Ndryshe nga SHBA, Bashkimi Evropian e konsideroi hap pozitiv vendimin e Kurtit për pezullimin e përkohshëm të tarifës 100% ndaj lëndës së parë që vjen nga Serbia. Berlini dhe Parisi janë duke bërë përpjekje për të ulur liderët e Kosovës dhe Serbisë sërish në tryezën e bisedimeve.
Në prill të vitit të kaluar u organizua në Berlin nga Merkel dhe Macron një samit me pjesëmarrjen e liderëve të dy shteteve, ku të ftuar ishin edhe homologët nga Ballkani Perëndimor. Ndonëse nuk u arrit në një marrëveshje midis Prishtinës dhe Beogradit, organizatorët u shprehën optimist për një tjetër samit që do të organizohej në Parsi në muajin qershor. Por kjo nuk u realizua.
Tashmë që po bëhet 1 vit nga Samiti i Berlinit, presidenti Macron është shprehur sërish i gatshëm të organizojë Samitin e Parisit, por Beogradi refuzon të ulet për marrëveshje nëse Prishtina nuk e heq plotësisht taksën.
Në lojë janë rikthyer fort edhe amerikanët, me të dërguarin e presidentit Donald Trump, Richard Gernell.
