Datë 26 shkurt 2020, në pikën e vogël të kalimit kufitar në Muriqan kalon rutinë mes shumë pasagjerëve edhe 28-vjeçari P.K., pa e kuptuar as ai dhe as të tjerët që sapo kishte “vulosur” ardhjen coronavirusi. Prekja e tij me virusin “COVID-19” u zbulua vetëm mbrëmjen e 8 marsit, por nuk shkoi i vetëm, duke infekruar edhe babanë e tij.
Plot dy javë sëmundja kishte fjetur, për të ngritur krye më datë 5 mars, ku ai shfaqi shenjat e para të rënda. Mësohet se ai kishte marrë në telefon urgjencën dhe i kishin sugjeruar që të vetëkarantinohej, ndërkohë sëmundja avanconte. Paraditen e së dielës ai paraqitet bashkë me të atin në Spitalin Infektiv në Tiranë, ku mjekët urdhëruan menjëherë të izoloheshin dhe t’i nënshtroheshin analizave për coronavirus. Fatkeqësisht, përgjigjia e analizave e konfirmoi që ishin të prekur nga ky virus që ka tronditur mbarë botën.
Ata janë izoluar në një nga dhomat e Spitalit Infektiv në Tiranë, në katin e parë të ndërtesës. Mësohet se gjendja shëndetësore e dy të prekurve është e stabilizuar dhe po marrin ndihmën e duhur mjekësore dhe po mbahen nën vëzhgim nga personeli mjekësor.
Pas konfirmimit të rastit u morën masa për dezinfektimin e ambientit, ndërsa e gjithë godina kaloi në karantinë dhe u rrethua me shirit, duke mos lejuar asnjë kontakt përveç personalit mjekësor dhe personave të autorizuar.
Por ndërsa u shënuar dy rastet e para menjëherë, madje nga e njëjta familje shumë pikëpyetje janë ngritur nëse mund të ishte menaxhuar më mirë ky rast. Vetë personeli mjekësor në Pikën e Kalimit Kufitar në Muriqan u shpreh se për rastin P.K., nuk është kryer procedura e detajuar e kontrollit mjekësor pasi ai vinte nga Firence (një zonë e cila nuk është shpallur me rrezik në Itali) dhe gjithashtu sipas tyre i riu nuk kishte simptoma.
Në orët e vona të mbrëmjes së djeshme u konfirmuan edhe katër raste të tjera të infektimit me koronavirus, tre prej tyre familjarë të dy personave të parë të infektuar./Fjala.al
