Italia ka shkallën më të lartë të vdekjeve si pasojë e koronavirusit. Një në 16 persona të infektuar ka vdekur si pasojë e këtij virusi.
Ekspertët thonë se duke pasur një nga popullsitë më të vjetra në botë, numri i madh i rasteve të përqendruara në një zonë të vogël dhe statistikat e pasakta kanë ndikuar në përhapjen e virusit.
Të paktën 10,590 njerëz deri më tani janë diagnostikuar me virusin e rrezikshëm, duke e bërë atë vendin më të goditur jashtë Kinës, me 827 viktima.
Shkalla e vdekjes është 6.22 përqind, sipas të dhënave më të fundit dhe cilësohet si më e larta në botë.
Në Kinë shkalla e vdekjes është 3.91 përqind dhe shkencëtarët mendojnë se kjo nuk është shifra reale pasi shumë raste nuk janë raportuar.
Italia është bërë epiqendra e krizës së koronavirusit në botë. Arsyeja është mosha e popullsisë pasi Italia ka popullsinë më të madhe të të moshuarve në Evropë, me gati një të katërtën e njerëzve (22 përqind) të moshës 65 vjeç ose më të vjetër.
Mosha mesatare është 46.5 vjeç, e pesta më e lartë në botë sipas CIA-s. Sa më i moshuar të jetë një person, aq më vdekjeprurëse mund të rezultojë sëmundja e koronavirusit.
Mosha është faktori më i madh i rrezikut sepse sistemi imunitar dhe mushkëritë janë më të dobëta, kështu që trupi është më pak i aftë të heqë pneumoninë.
Hulumtimet kanë zbuluar që njerëzit e moshës 80 vjeç e më të vjetër kanë një rrezik prej 14.8 përqind (një në shtatë) të vdesin nëse infektohen me COVID-19, sëmundjen e shkaktuar nga koronavirusi.
Presidenti lokal i Lombardisë, Attilio Fontana, konfirmoi: ‘Të gjitha vdekjet që kemi pasur janë ose njerëz të moshuar ose njerëz shumë të sëmurë,’ sipas raportimit të New York Times.
Njerëzit të cilët kanë probleme të tjera shëndetësore afatgjata, të tilla si diabeti, sëmundjet e zemrës ose kanceri janë gjithashtu në një rrezik më të madh, sepse ata kanë sistem imunitar më të dobët se zakonisht.
Simptomat e paqarta të infeksionit COVID-19 gjithashtu kontribuan në një reagim të vonuar ndaj shpërthimit, sepse erdhi gjatë sezonit të gripit.
Një studiues në Insitutin Kombëtar të Shëndetit italian tha për revistën “Time”: ‘Virusi po qarkullonte prej kohësh’.
“Kjo ka ndodhur menjëherë kur ne kemi pasur kulmin e gripit dhe njerëzit menduan se ishin simptoma të gripit.”
Pacienti i parë i konfirmuar mendohet se e ka kaluar virusin te të paktën pesë persona të tjerë, përfshirë mjekë dhe pacientë në spitalin ku ai u dërgua, përpara se të diagnostikohej.
Zyrtarët ende nuk e dinë se si u infektua një shtetas 38-vjeçar në Milano, dhe ata I druhen faktit se virusi ka qarkulluar për javë të tëra para se të zbulohej./Fjala.al/Përshtati:Kamela Liko/Burimi:DailyMail
