Frika nga përhapja e koronavirusit ka bërë që këtë të mërkurë të mbyllen shumë biznese në Tiranë.
Teksa mbrëmjen e kaluar policia mbylli të gjitha lokalet e natës dhe palestrat, mesditën e sotme, kryeministri Rama dhe ministrja e Shëndetësisë, Ogerta Manastirliu, në një dalje për mediat publikuan urdhrin për të mbyllur të gjitha, lokalet, kafet, baret, restorantet.
Afati i fundit për të mbyllur lokalet dhe baret është ora 00:00 e ditës së sotme.
Por disa prej lokaleve dhe bareve i kanë mbyllur vullnetarisht ambientet e tyre para afatit që ka vendosur qeveria.
Si kurrë më parë Tirana duket mjaft e qetë dhe e errët. Kjo për shkak të lokaleve që kanë fikur dritat dhe mbyllur dyert për klientët.
Mjafton të ecësh në rrugë dhe nuk të shpëton dot errësira që krijon kompleski më i madh në qendër të Tiranës, Taiwan, i cili përveçse ka mbyllur dyert e lokalit dhe restorantit siç mund të shikohet më poshtë ka mbyllur edhe kazinonë.
Po ashtu përballë tij ndodhen “Shallvaret”, më të errëta se kurrë më parë.
Pak më lart është “Blloku”, ku banorët e kësaj zone ndoshta për herë të parë pas viteve 90 do të bëjnë një gjumë të qetë.
