Të gjitha restorantet, baret dhe klubet në Tiranë dhe Durrës do të mbyllen. Kryeministri Edi Rama bën me dije se në kuadër të masave ekstreme, ky vendim do të merret fillimisht në kryeqytet dhe në Durrës duke parë shkallën e ulët të vetëdijes së qytetarëve.
“Ndjesë por duke parë shkallën e ulët të vetëdijes së shumë qytetarëve, kryesisht të rinj, që e kanë edhe më të vështirë të rrinë në një vend, detyrohemi të mbyllim të gjitha restorantet, baret, klubet, në Tiranë dhe Durrës fillimisht”, shprehet Rama.
Kryeministri thotë se “kjo nuk është kohë pushimesh dhe argëtimesh jashtë shtëpisë, po kohë lufte dhe kjo luftë fitohet vetëm duke kufizuar lirinë tënde, duke ndryshuar rrënjësisht mënyrën e jetesës dhe duke ruajtur familjen tëndë nga kontaktet e tua me jashtë.”
Një grua e moshës 73 vjeç ndërroi jetë pak orë më parë si pasojë e koronavirusit, ndërsa 11 të tjerë janë të infektuar.
