Menjëherë pasi kryeministri Edi Rama njoftoi se Policia e Shtetit dhe Policia Ushtarake do të ngrejnë në rrugët e vendit postblloqe në kuadër të masave ndaj koronavirusit, në Drejtorinë e Policisë së Tiranë kanë nisur mbledhjet.
Njësia e “Shqiponjave” është mbledhur nga drejtuesit për t’u njohur me protokollin që duhet të ndjekin, personat që do të kenë në fokus dhe mënyrën se si do të veprojnë në rrugë.
Kryeministri bëri me dije se çdo person që konfirmohet se është rikthyer 14 ditët e fundit nga Italia apo vatrat e tjera të koronavirusit dhe nuk është vetëkarantinuar do të gjobitet me 5 mijë euro.
“Shqiponjat” do të jenë në krye të këtij aksioni, por mesa duket organizimi nuk ka nisur në mënyrën më të mirë. Një grup i konsiderueshëm i efektivëve janë mbledhur në Drejtorinë e Policisë së Tiranës por atyre u mungojnë të paktën maskat.
Drejtuesit duhet të kuptojnë se efektivët mund të bëhen mbajtës dhe përcjellës të koronavirusit jo vetëm gjatë konktatit me njerëzit në rrugë, por edhe midis tyre, sidomos në grupe të tilla të mëdha.
