Ministri i Brendshëm Sandër Lleshaj përmes një videoje të publikuar në Facebook thekson se orët dhe ditët në vijim do të jenë vendimtare ndaj situatës së krijuar nga koronavirusi. Për këtë arsye kontrolli i policisë në pikat kufitare do të mobilizohet edhe më shumë.
Lleshaj i kërkon qytetarëve të tjerë të qëndrojnë në shtëpi dhe të bashkëpunojnë.
Statusi i Sandër Lleshajt: Situata përballohet kur secili bën pjesën e tij. Ndërkohë që punonjësit e shëndetësisë, të policisë, ushtarakët e të tjerë duhet të mbajnë barrën kryesore, të tjerët duhet të bëjnë një gjë më të thjeshtë, por po aq të rëndësishme: të qëndrojnë në shtëpi.
Policia, e mbështetur nga ushtria, vijon kontrollin e gjerë për kufizimin e lëvizjeve në të gjithë vendin. Orët dhe ditët në vijim janë vendimtare për frenimin e përhapjes së virusit në vend. Ndaj ky angazhim do të njohë thellim të mëtejshëm, me bindjen se qytetarët do të bashkëpunojnë dhe mbështesin strukturat e vijës së parë.
