Bashkia e Roskovecit i ka kërkuar autoriteteve të shëndetit publik dhe policisë që të vendosin karantinimin e fshatit Mbërs. Në këtë fshat rezultuan të prekur me koronavirus një çift bashkëshortësh, të cilët kishin pasur histori udhëtimi me Italinë.
Pas konfirmimit të këtyre dy rasteve, bashkia e Roskovecit mori masa për izolimin e fshatit. Nga të dhënat paraprake mendohet se çifti i bashkëshortëve që rezultuan pozitiv me Covid-19, kanë pasur kontakte me një numër të konsiderueshëm të banorëve të këtij fshati. Për këtë arsye është kërkuar izolimi i banorëve në banesat e tyre ndërsa edhe lëvizja e mjeteve të autorizuara drejt fshatit Mbërs po mbikëqyret rreptësisht nga policia dhe ushtria.
Por banorët nuk e kanë kuptuar rëndësinë e masave të marra.
Çifti i bashkëshortëve nga fshati Mbërs i Roskovecit janë kthyer me 6 mars nga Italia. Ata jetojnë në Fier por kanë të afërmit në Mbërs. 61-vjeçarja ka një dyqan ushqimor në lagjen 1 Maji në Fier. Ajo qëndroi 2 ditë në repartin e patologjisë të spitalit rajonal Fier deri sa erdhi përgjigjia se ishte e prekur me koronavirus.
18 mjekë, infermierë dhe sanitare që i kanë shërbyer 61-vjeçares, prej dy ditësh janë vetëkarantinuar.
Ndërkohë, edhe bashkëshorti i saj, 5 ditë më parë ka qenë në një ceremoni mortore në fshatin Mbërs. Sipas banorëve ai është takuar me familjarët e të ndjerit por edhe më shumë bashkëfshatarë. Banorët thonë për TCH se nuk kanë frikë nga infektimi me Covid-19 dhe nuk kanë përse të hyjnë në karantinë. Madje, pa e ditur nëse janë ose jot ë infektuar, ata kryejnë ‘nderet’ te njëri-tjetri.
