Një shqiptare e cila jeton në Gjermani duke folur mbi situatën nga koronavirusi në këtë vend ka bërë një parashikim të frikshëm për rrjedhën që mund të marrë përhapja e covid-19.
Shtetasja shqiptare Migen Begolli është shprehur se sot ka një tjetër panoramë pasi ka më pak lëvizje por sërish nuk ka një mbyllje totale të koronavirusit.
Sipas Begollit brenda 8 ditësh Gjermania do të jetë në nivelin e Italisë, pasi siç shprehet ajo numri i të infektuarve rritet me 32% çdo ditë dhe masat nga ekspertët janë konsideruar të ngadalta.
“Gjermania ka një frymëmarrje tjetër sot si pasojë e masave të marra nga qeveria, më pak kalimtarë, më pak makina. Nuk ka panik por njerëzit janë vetizoluar. Gjermania nuk e ka bërë akoma atë mbylljen totale që ka ndodhur në Shqipëri. Në Gjermani për herë të parë që prej shfaqjes së COVID-19 është arritur të bëhet një videoekonferencë e Merkel dhe 16 landeve.
Kemi 8 mijë të infektuar dhe 17 të vdekur. Ajo që i vë në vigjilencë ekspertët është që ka një rritje të shkallës së infektimit me 32% në ditë. Pritet një dyfishim i shifrës për 2-3 ditë.
Kemi një zhvillim kulminant të numrit të infektuarve. Ky numër madje thuhet se nuk është numri real i personave të infektuar. Mendohet të jetë minimumi 4 herë më i madh”, tha Begolli për News 24.
Ajo deklaroi se nuk ka testime në masë të gjerë por vetëm ata që kanë simptoma.
“Zyrat e Shëndetit bëjnë testime vetëm në qoftë se pacienti paraqet simptoma. Kemi dhe kolegë të administratës që kanë treguar simptoma dhe futet në vetëkarantinë për 2 javë.
Virologët po e kritikojnë Gjermaninë që nuk po bëhet shut-doën. Ka institucione që akoma punojnë. Ne punojmë, nuk kemi publik por sido që të jetë ke kontakte, lëvizje. Ekspertët i quajnë të ngadalta hapat. Pritet situatë si në Itali, maksimumi në 8 ditë pritet përhapje e virusit. Problemi është a do jenë qendrat t’i presin gjithë këta njerëz. Mungon një vendim”, tha Begolli.
