Shkolla “Omiros” në Korçë ka reaguar pasi lajmeve se një mësues i saj ka rezultuar pozitiv ndaj koronavirusit.
Përmes një deklarate për mediat kjo shkollë bën me dije se ka vepruar që në çastin e parë që ka marrë vesh këtë ngjarje dhe shton se personi në fjalë mund të jetë infektuar pasi janë mbyllur të gjitha institucionet arsimore.
Ndërsa më tej shton se janë marrë të gjitha masat përkatëse dhe se familjarët e personit me koronavirus kanë rezultuar negativ në testin për këtë sëmundje.
Deklaratë zyrtare
Në lidhje me rastin e arsimtarit të shkollës “Omiros” Korçë, i cili u gjend pozitiv në testin për koronavirus, Drejtoria e Shkollës deklaron se veproi që në çastin e parë me përgjegjësi të plotë dhe sipas udhëzimeve të dhëna nga institucionet përkatëse të Republikës së Shqipërisë.
Arsimtari ka shumë mundësi që të jetë infektuar pas mbylljes së shkollave në vend, por meqënëse nuk ka siguri të plotë për këtë Drejtoria e Shkollës informoi menjëherë të gjithë prindërit e nxënësve dhe institucionet përkatëse ashtu siç duhej.
Ju sigurojmë se janë marrë masat përkatëse dhe po ndiqen rregullisht të gjitha procedurat e parashikuara.
Mësuesi që është vendosur në karantinë është duke marrë kurën e përshtatshme, ndërsa anëtarët e familjes së tij, të cilët po ashtu kanë kryer analizat e nevojshme, u gjendën negativë ndaj koronavirusit. Në çdo rast shkolla jonë do të kryejë dhe dezinfektim të detajuar para se të funksionojë sërish.
Nga Drejtoria e Shkollës “Omiros”./Fjala.al/
