Nga Nikoleta Kovaçi/
Një familje nga Shkodra kërkon ndihmën e të gjithë shqiptarëve që jetojnë në zonën e Milanos. Iu ka humbur kontaktet njeriu i tyre që prej 11 ditësh dhe ende nuk kanë asnjë informacion për të. Ata i kanë kërkuar ndihmë edhe Policisë së Shkodrës dhe madje edhe personave që kanë patur kontaktin e fundit me të, që i bie të jenë dy shoferët e autobusit të linjës Shqipëri-Itali që ka bërë rrugën mes datave 7 dhe 8 mars.
Sipas të dhënave bëhet me dije se 70-vjeçari i identifikuar si Gjekë Marku, nga fshati Ças i Velipojës, në Bashkinë e Shkodrës, i datëlindjes 15.08.1950, rezulton i zhdukur. Lajmin e bëjnë të ditur familjarë të tij. Në interesimin e tyre por edhe nga të dhënat e sistemit TIMS, bëhet me dije se 70-vjeçari, Gjekë Marku më 7 mars 2020 ka kalur përmes Pikës së Kalimit Kufitar Muriqan-Sukobinë me autobusin e linjës Shkodër-Milano. Dhe me datën 08.03.2020 ka zbritur në qytetin e Milanos.
Në interesimin e familjes të cilët kanë arritur të kontaktojnë me drejtuesit e autobusit të linjës këta të fundit janë shprehur se Marku ju ka thënë se do të vijnë ta marrin familjarët e tij, aty në stacion. Sipas të dhënave askush nga të afërmit nuk ka pasur dhe as ka dijeni për këtë udhëtim të tij drejtë shtetit italian. Familjarët e 70-vjeçarit kërkojnë informacion që mund të ketë vlerë për gjetjen e tij, pasi i moshuari sipas të dhënave të familjes është person me probleme shëndetësore.
Po ashtu sipas të dhënave është kërkuar ndihmë edhe nga persona që kanë lidhje me spitalet e Milanos, po ashtu edhe qasje në Questurë, atje ku edhe mund të gjendet informacion mbi personat që mund të jenë gjetur në rrugë. Familja nga Velipoja, në fakt, nuk ka vënë në dispozicion ende asnjë numër telefoni, por nëse ndokush ka të dhëna apo edhe informacion mbi këtë person të njoftojë në Drejtorinë e Policisë së Shtetit të Shqipërisë
