Ministria e Strehimit në Francë, do të hapë 2 dy qendra karantinimi në Paris, ku do të akomodohen të pastrehët e qytetit. Secila nga këto qendra, do të ketë 150 shtretër për personat e pastrehë, të cilët rezultojnë të jenë pozitivë me COVID-19, por që për momentin nuk kanë nevojë që të shtrohen në spital.
Kjo nismë, do të zgjerohet në mbarë Francën, teksa autoritetet po planifikojnë të hapin nga një qendër të tillë në çdo rajon. Ndërkohë, mendohet të ketë më shumë qendra në rajonet që janë më të mëdha. Tani për tani, autoritetet kanë identifikuar mbi 80 godina në të gjithë vendin, që do të mund të mirëpresin gjithsej 2.875 njerëz të pastrehë.
“Qasja në këto qendra, do të vendoset bazuar në këshillat e mjekëve”- tha në një komunikatë për mediat Ministria e Strehimit. Rajoni i Ositanisë në Francën Jugperëndimore, njoftoi të mërkurën se do të çelë menjëherë një qendër në Tuluzë me 50 vende.
Nga kjo ministri u njoftua gjithashtu, se do të ketë një qendër tjetër me 40 vende në një rajon tjetër gjatë kësaj jave. Qëkur qeveria franceze ndërmori të martën masa drastike për izolimin e detyruar të të gjithë banorëve, shoqatat bamirëse lanë të gjitha angazhimet e tyre të zakonshme, dhe u morën me ndihmën ndaj të pastrehëve, me ndihma ushqimore dhe strehim.
“Kjo ndodhi për shkak të mungesës së njerëzve, pasi punonjësit dhe vullnetarët duhet të izolohen ose të kujdesen për fëmijët e tyre që nuk shkojnë tashmë në shkollë”- deklaroi për AFP, Florent Gueguen, drejtori i Federatës jo-fitimprurëse për solidaritetin (FAS).
Ai deklaroi gjithashtu se grupet e vullnetarëve, nuk kanë mjaftueshëm maska mbrojtëse. Rreth 157.000 njerëz të pastrehë, janë vendosur aktualisht në qendra sociale. Qeveria franceze, njoftoi së fundi i “strehimit dimëror”, përgjatë të cilit askujt nuk do t’i kërkohet të largohet nga strehëzat, është shtyrë deri më 31 maj.
Ndërkohë, afati ishte parashikuar të mbaronte më 31 mars. ”Qendrat sociale, duhet të qëndrojnë të hapura që të vazhdojnë të ofrojnë strehim për njerëzit në situata të pasigurta”- deklaroi ministria.
S.T
