Endrit Demiri, me profesion avokat është arrestuar gjatë një operacioni të komisariatit nr.1 në Tiranë. Kjo pasi gjatë kontrollit në banesën e tij në Tiranë dhe në një banesë tjetër në fshatin Pëllumbas të kryeqytetit, policia ka arritur t’i sekuestrojë avokatit një arsenal të tërë me armë luftarake dhe municione të rënda.
Tre automatikë kallashnikovi, një pushkë gjysmë automatike me karikatoren përkatëse, mbi 200 plumba automatiku, katër granata dore, dy sinjalizues dhe materiale të tjera të paligjshme janë gjetur në dy banesat që përdorte avokati Endrit Demiri.
Arrestimi i këtij personi është ndjekur nga afër prej oficerëve të komisariatit nr.1 në Tiranë, ku mes personave u shoqërua në komisariat ishte dhe gruaja e avokatit, Daniela Zaloshnja. Kjo e fundit pasi është marë në pyetje është lënë sërisht e lirë dhe se ndjekje penale për akuzën e Mbajtje pa lejë të armëve dhe municioneve është bërë vetëm për avokatin Endrit Demiri.
Mësohet se Demiri ishte pjesë e grupit “Ilirians Albania” në Tiranë. Pritet që ditën e hënë ose të martë ai të dalë para gjykatës së Tiranës, ku do të njihet me masën e sigurisë arrest në burg që do kërkojë prokurori.
