Mjeku Pëllumb Pipero dha informacione mbi rastin e 61 vjeçarit, i cili u raportua këtë mëngjes si viktima e pestë nga koronavirusi. Por sipas Piperos, “një nga rastet sot ka bërë vdekje klinike, vdekje që zgjati relativisht gjatë por pa e humbur shpresën e personelit mjekësor për ta rikthyer, fatmirësisht u rikthye në jetë por vazhdon të jetë ende rëndë”.
Aktualisht në Spitalin Infektiv janë shtruar 40 pacientë, ndërkohë që mjeku Pipero kërkon nga qytetarët “të jenë të duruar, të qëndrojnë sa më gjatë në shtëpi e nëse kanë nevojë të telefonojnë 127 që tu qëndrojmë afër me shërbim mjekësor”.
Reagimi i plotë
Situata në Infektiv është shumë dinamike, sa i takon shtrimeve të rasteve të reja, ndjekjes në dinamikë të rasteve të shtruara në të, kemi më shumë se 40 të shtruar në spital, secili ka problematikën e tij, në varësi të moshës dhe sëmundjeve kronike, kemi raste relativisht në gjendje të mirë, kemi raste në gjendje të mirë që shpresojmë ti nxjerrim kemi edhe raste të rënda e shumë të rëna si ata në terapi intensive mes të cilëve një nga rastet sot ka bërë vdekje klinike, vdekje që zgjati relativisht gjatë por pa e humbur shpresën e personelit mjekësor për ta rikthyer, fatmirësisht u rikthye në jetë por vazhdon të jetë ende rëndë.
Në këtë situatë të rasteve të shtuara dhe të konfirmuara në këto dy ditë, vazhdoj të këmbëngul e t’ju them qytetarëve të jenë të duruar, të qëndrojnë sa më gjatë në shtëpi e nëse kanë nevojë të telefonojnë 127 që tu qëndrojmë afër me shërbim mjekësor.
