Kur Shqipëria dhe shumë vende të botës po vuajnë nga pandemia globale e koronavirusit, nga Brukseli ka mbërritur një lajm i mirë; hapja e negociatave me Tiranën zyrtare dhe Maqedoninë e Veriut.
Vendimin e Këshillit të Ministrave të Bashkimit Evropian, për hapjen e negociatave me këto dy vende e ka përshëndetur edhe presidenti i Kosovës Hashim Thaçi.
Sipas Thaçit, vendimi i sotëm është një hap i rëndësishëm drejt integrimit evropian për Shqipërinë dhe Maqedoninë e Veriut.
“Vendimi i sotëm i Këshillit të Ministrave të Bashkimit Evropian për hapjen e negociatave për Shqipërinë dhe Maqedoninë e Veriut është një hap i rëndësishëm drejt integrimit evropian për këto dy vende, për shqiptarët dhe për gjithë rajonin tonë. Përkundër padrejtësive të vazhdueshme, më në fund edhe Bashkimi Evropian nisi të marrë vendime meritore dhe kjo uroj të jetë një kthesë e tyre për trajtim të barabartë të tërë shteteve të Ballkanit Perëndimor”, ka shkruar Thaçi në Facebook.
Thaçi shkruan më tej se Bashkimi Evropian po vazhdon të diskriminojë Kosovën.
“Fatkeqësisht, Bashkimi Evropian po vazhdon ta diskriminojë Kosovën duke e lënë të izoluar dhe ende pa statusin e vendit kandidat për anëtarësim. Ky është gabimi më i madh strategjik, që Bashkimi Evropian është duke e bërë kundër Kosovës”, ka thënë ai.
