Ambulanca e Spitalit Rajonal të Beratit ka hedhur në rrugë një të sëmurë dhe më pas është larguar. Kjo ka sjellë edhe irritimin e punonjësve të Qendrës “Lira”, ku edhe u la edhe personi.
Punonjësit e kësaj qendre, kanë denoncuar me video rastin në fjalë dhe menjëherë kanë njoftuar organet kompetente, duke mundësuar edhe marrjen sërish të të sëmurit dhe rikthimin e tij në spital rreth 1 orë pas ngjarjes.
Punonjësit kanë njoftuar prefekten e qarkut Berat, policinë dhe spitalin për këtë rast të paprecedent, ku mësohet se pacienti ishte një 45-vjeçar endacak nga lagjja “Kala” në Berat, i cili ndodhej i shtruar prej disa javësh në një nga repartet e Spitalit Rajonal Berat pasi vuante nga kanceri, raporton BË.
Gjithashtu është kontaktuar nga mediat, drejtoresha e Spitalit, Edlira Shkëmbi. Ajo nuk ka dhënë asnjë informacion në lidhje me personat që ndodheshin brenda ambulancës shtetërore të spitalit dhe në lidhje me personin që urdhëroi ambulancën të hedh në rrugë pacientin dhe ta mbulojë me batanije.
Nga ana tjetër, policia mësohet se po heton në lidhje me ngjarjen e rëndë dhe përgjegjësit e saj.
