Pasi mocioni i kërkuar prej tij në Kuvend rrëzoi qeverinë e Kosovës, kreu i LDK-së, Isa Mustafa i është rikthyer epidemisë së koronavirusit. Tashmë që qeveria e drejtuar nga Albin Kurti është në ikje, Mustafa thotë se nuk do i tërheq ministrat për shkak të COVID-19. Gjithsesi, lideri i LDK-së thotë se i takon Kurtit të vendosë.
“Në kohën kur po ballafaqohemi me Pandeminë e COVID-19, si Kryetar i LDK-së, nuk do ti tërheq njëanshëm ministrat dhe zëvendësministrat e LDK-së nga detyrat e tyre në Qeverinë në dorëheqje.
Pasi që koalicioni VV-LDK ka rënë mbrëmë me mocion votëbesimi me votat e mbi 2/3 e deputetëve, mbetet në vullnetin e Kryeministrit në detyrë, z.Kurti, se a do të vazhdoj të punoj me ta gjatë kësaj gjendjeje emergjente, derisa të zgjedhet qeveria tjetër, apo do të bëj veprime tjera, ashtu siç e liroi z. Avdullah Hoti nga pozita e zëvendëskryeministrit të parë mbrëmë para mesnate”, shkruan Mustafa.
Me votat e LDK-së dhe partive opozitare, në Kuvend u rrëzua dje qeveria e drejtuar nga Albin Kurti. Vetëm 50 ditë në pushtet arriti të qëndronte koalicioni i përbërë nga Lëvizja Vetëvendosje dhe Lidhja Demokratike e Kosovës.
