Kriza që ka përfshirë Shqipërinë si pasojë e koronavirusit ka bërë që qeveria të ndihmojë familjet në nevojë kryesisht përmes dërgimit të ushqimeve.
Në një intervistë për Vizion Plus, kryeministri Rama u pyet se çfarë po bëhet për të varfrit, dhe se a mjafton vetëm ndarja e pakove me ushqime.
“E çfarë duhet të bëjmë tjetër për shembull?” u përgjigj po me pyetje kreu i qeverisë. Nga ana tjetër, gazetari sugjeroi që qeveria t’iu dërgojë lekë në dorë njerëzve të varfër.
Rama: “T’u dërgojmë para në duar. Po ku t’i gjejmë paratë.?”
Gazetari: Nga fondi i paketës social-ekonomike që keni ndarë!
Rama: Ato janë akorduar dhe do të shpërndahen patjetër. Por ndërkohë unë dua ta nënvizoj që kjo është një luftë dhe në kohë lufte luftohet për mbijetesë. Nuk vazhdohet të jetohet sikur lufta po ndodh diku tjetër, që do të thotë se ne do të shpërndajnë ndihma ushqimore. Ndërsa të tjerët sipas nevojave duhet të shtrëngohen sepse këtu jo vetëm deti nuk është bërë kos, por gjërat janë të shtrënguara. Shteti është si një familje e zakonshme shqiptare, nuk i ka të pakufizuara mundësitë e veta.
