Me lajmin se kryministri britanik Boris Xhonson është infektuar me koronavirus, dhe me vetëizolimin e kryeministrit kanadez Xhastin Trudo, po bëhet e qartë se punët që kërkojnë shumë takime dhe shtrëngime duarsh, nuk janë për momentin ndër profesionet më të sigurta.
Në Rusi, po rritet frika se sëmundja mund të ketë depërtuar tashmë në rrethin më të afërt të presidentit Vladimir Putin. Ankthi është shtuar, pasi të premten u konfirmua se të paktën 1 punonjës i administratës presidenciale, mund të jetë prekur nga Covid-19.
Zëdhënësi i Putinit u tha gazetarëve se ishte në dijeni të situatës. Sidoqoftë, Dimitri Peshkov tha se personi në fjalë, nuk kishte kontakte të drejtpërdrejta me Putin. Ai hodhi gjithashtu poshtë spekulimet për një tjetër të infektuar.
“Unë kam dijeni vetëm për 1 rast, dhe mund ta konfirmoj këtë. Nuk kam dijeni për të dytin”-u tha Peshkov gazetarëve të premten. Të enjten, në mediat sociale ruse qarkulloi një thashethem, që burimin e kishte nga e përditshmja “Moska RBK”, se dy punonjës të administratës presidenciale kishin dalë pozitiv në testin për koronavirusin.
Pas mohimit të Peshkov, edhe zëdhënësja për çështje administrative, Elena Krillova, pretendoi se nuk kishte dijeni për një rast të dytë. Të enjten, zyra për shtyp e kabinetit rus i tha agjencisë së lajmeve “Interfax”, se dyshohej se një punonjës ishte prekur nga Covid-19, dhe ishte dërguar në karantinë.
Por kjo nuk është frika e vetme në Kremlin. Peshkov konfirmoi të premten, se ai vetë ishte në festën e ditëlindjes së Alla Krutoj, motrës së kompozitorit Igor Krutoj. Sipas raportimeve, në festë mori pjesë edhe këngëtari Lev Leshçenko, që tashmë është konfirmuar si i prekur me koronavirus.
“Po, unë kam qenë atje. Por nuk takova Leshçenkon. Me sa duket, ai me shumë gjasa ishte larguar”- tha Peshkov. Më 23 mars, 78-vjeçari Leshçenko dhe gruaja e tij Irina shkuan vullnetarisht në spitalin “Kommunarka” për t’u trajtuar për shkak të koronavirusit.
Dy ditë më vonë, këngëtari iu nënshtrua kujdesit intensiv. Thuhet se tani ai është në një
gjendje të qëndrueshme. Sipas njoftimeve në media, në festën e Krutaja morën pjesë shumë personalitete të shoubizit rus, si tenori Nikolai Bashkov dhe komediani Aleksandër Reva.
Tani ekziston frika, se koronavirusi mund të ketë infektuar shumë njerëz në mesin e shoqërisë së lartë të Moskës.
Në profilin e saj në rrjetin social “Telegram”, ish-kandidatja për presidente Ksenia Sobçak shkroi:“Tani që gjithë ata që ishin në festë tani janë të alarmuar!”. Edhe nëna e Sobçak, senatorja Ludmila Narusova, është shtruar gjithashtu në spitalin “Kommunarka”, për shkak të koronavirusit./S.T /Fjala.al
