Presidenti i Turqisë, Recep Tayyip Erdoğan, ka vendosur të solidarizohet me vendin e tij duke dhuruar shtatë muaj të pagës së tij sipas një raportimi të Anadolu Agency (AA).
“Unë po e filloj Fushatën Kombëtare të Solidaritetit duke dhuruar pagën time shtatë muajshe”, tha presidenti Erdoğan në fjalimin e tij para kombit. Erdoğan theksoi se anëtarët e kabinetit në qeveri dhe ligjvënësit po ashtu kanë dhuruar 5.2 milionë lira turke (791 mijë dollarë) në fushatë.
“Turqia po hap me shpejtësi spitale të reja përderisa po ashtu forcon ato ekzistuese. Ne jemi të vendosur të përdorim të gjitha mjetet për të frenuar përhapjen e koronavirusit”, tha presidenti turk. Ne raportimin e fundit Ministria e Shëndetësisë e Turqisë njoftoi se në 24 orët e fundit janë regjistruar 37 raste të reja të vdekjeve nga koronavirusi, duke e çuar numrin e përgjithshëm të vdekjeve në vend në 168.
Në Turqi janë konfirmuar 10.827 raste me Covid-19, nga të cilat 1.610 janë konfirmuar vetëm në 24 orët e fundit.
