30 mjekët dhe infermierët shqiptarë që shkuan në Itali për të ndihmuar vendin fqinj në luftën ndaj koronavirusit janë përgëzuar nga të gjithë dhe ndodhen tashmë në qendër të vëmendjes.
Një numër i madh mediash kanë shkruar për ta, madje “La Stampa” ka zhvilluar intervista me mjekët dhe infermierët shqiptarë, të cilët dje kanë filluar edhe punën në spitalet italiane. Disa prej të cilëve kanë treguar eksperiencat e tyre dhe faktin sesi e kanë pritur shkuarjen në Itali.
Mjekët dhe infermierët shqiptarë kanë thënë se janë të vetëdijshëm që janë të rrezikuar më tepër nga të tjerët nga Covid-19, por thonë se ky është misioni i profesionit të tyre, të shërojnë njerëz, në këtë rast ata me koronavirus.
“La Stampa” ka zhvilluar intervista me mjekët nga Shqipëria dhe ka cituar disa prej tyre.
Doina Jano
“Sigurisht që kemi frikë. Por ne jemi mjekë dhe kjo është detyra jonë. Çdo ditë të jetës sonë ne luftojmë kundër armiqve të padukshëm. Për ne gjithmonë është luftë. Edhe pse kam frikë dua të bëj më të mirën për popullin italian. Gjithmonë kam dashur ta vizitojë Italinë. Fati donte që për herë të parë ta vizitoja pikërisht tani, për të ndihmuar njerëzit dhe mjekët italianë. Kjo eksperiencë do të jetë për mua edhe një përvojë profesionale ”
Alma Zelo
“Në fillim i thashë vetëm bashkëshortit tim dhe jo prindërve sepse kisha merak se do të shqetësoheshin dhe nuk do më linin të vija. Ata nuk e dinin derisa shkova në aeroport. Megjithatë tani kam mbështetjen e tyre. Unë pres të jap më të mirën time. Për momentin bëj teste tamponi për të zbuluar rastet me Covid-19 duke shpresuar që të rezultojnë negativ”.
Ornela Gela
“Unë kam studiuar në Itali, kam jetuar këtu dhe mendoj se kam lidhje më të forta me Italinë se të tjerët dhe sapo ma propozuan nxitova për të ardhur. Të dy prindërit e mi janë mjek dhe nuk e kundërshtuan vendimin tim. Iu thash që do shkojë dhe se shpresoj se do të fitojmë dhe do të fitojmë. Le të shpresojmë”./Fjala.al/
