Kryeministri Edi Rama ka theksuar se tashmë Shqipëria ka hyrë në zonën e zjarrit sa i përket rrezikut që paraqet koronavirusi.
Duke iu referuar 27 rasteve të reja që rezultuan të prekur me koronavirus në 24 orët e fundit, kreu i qeverisë tha se shqiptarët duhet të ushqejnë të gjithë bashkë rezistencën, pasi sipas tij ekonomia bie dhe ngrihet prapë, por të vdekurit nuk ringjallen më.
Gjithashtu, Rama ka publikuar një video e cila bën fjalë për Iranin, i cili numëron deri më sot 3 mijë e 100 viktima nga koronavirusi. Në të shfaqen pamje të varrezave të provincës Qom apo zonave të tjera se si viktimat shtoheshin dita ditës me shpejtësi, ndërsa Rama kërkon që fëmijët të mbahen larg këtyre pamjeve.
STATUSI I EDI RAMËS
*kujdes, mbani fëmijët larg nga videoja bashkëngjitur
? SOT KEMI 27 POZITIVË! KEMI HYRË NË ZONËN E ZJARRIT, KU ARMIKU PO SYNON TË NA MARRË MË SHUMË JETË, PASI REZISTENCA JONË DERI TANI E KA NDALUAR TË BËJË KËRDINË DUKE NA SHKATËRRUAR BARRIKADËN BLUZAVE TË BARDHA!
? SOT JU BËJ NJË THIRRJE TË FORTË TË MOTIVOJMË TË GJITHA FORCAT SHPIRTËRORE DHE MENDORE BRENDA NESH, PËR TË USHQYER REZISTENCËN, DUKE MOS HARXHUAR ENERGJI PËR ASGJË TJETËR!
? SOT JU LUTEM ME TË GJITHË FORCËN TA VENDOSNI SI KRYEFJALË TË ÇDO DITE NË VIJIM MOTON JETIKE TË LUFTËS SONË: EKONOMIA BIE DHE NGRIHET PRAPË, TË VDEKURIT NUK RINGJALLEN MË!
? SOT ASGJË NUK VLEN MË SHUMË SE JETA DHE MBROJTJA E JETËS ËSHTË QËLLIMI, NE JEMI MJETI PËR REALIZIMIN E KËTIJ QËLLIMI NJERËZOR, QYTETAR, KOMBËTAR!
? SOT JAM I DETYRUAR T’JU JAP KËTË VIDEO RRËQETHËSE QË TA SHIKONI SI DO KISHIM PËRFUNDUAR, PO TË MOS ISHIM FUTUR MË SHPEJT SE TË TJERËT NË MBROJTJE, POR EDHE SI, MOS E DHËNTË ZOTI, MUND TË PËRFUNDOJMË NËSE PËR MUSTAQET E ÇELOS HAPIM VRIMA NË BARRIKADAT TONA!
