Mjeku i njohur Dhimitër Kraja i cili vetëm para dy ditëve arriti të fitojë betejën me koronavirusin ka bërë një tjetër veprim të jashtëzakonshëm.
Ai është shprehur se do të rikthehet pranë pacientëve të tij në Spitalin Infektiv të Tiranës.
Lajmi është bërë i ditur nga Ministria e Shëndetësisë, së cilës Dhimitër Kraja i ka komunikuar se është i gatshëm të kthehet te Infektivi pranë pacientëve që vuajnë nga koronavirusi.
Sipas Ministrisë së Shëndetësisë Kraja kishte shprehur gatishmërinë dhe dëshirën për t’u rikthyer pranë kolegëve dhe pacientëve të tij.
“Prof. Dhimitër Kraja ka rezultuar negative nga testimi i fundit, pra është i shëruar dhe gjendja e tij shëndetësore është shumë e mirë. Kur bisedova me të më tha që do të rikthehet në shërbim,”– thuhet në njoftimin e dhënë nga Manastirliu.
Dhimitër Kraja kthehet në spital në një moment kur vetë ai sapo ka kaluar koronavirusin. Një gjest tillë padyshim që do t’u japë kurajë edhe vetë kolegëve të mjekut Kraja në Spitalin Infektiv në luftën ndaj Covid-19.
