Përgjatë ditëve të fundit, Irani ka pasur trazira të shumta të paktën në 10 burgjet e vendit. France 24 sjell pamjet ku mungojnë edhe gjërat më elementare të higjienës si sapuni dhe uji. Ndërsa nga ana tjetër, të burgosurit janë ngritur në revoltë.
Mediat shtetërore raportojnë trazira në burgjet e shumta, ku ka pasur edhe të vdekur në Khorramabad në provincën perëndimore të Loristanit, ndërsa kanë ndodhur edhe arratisje të shumta.
Megjithatë, sipas France24, aktivistët e të drejtave të njeriut thonë se dhjetëra të burgosur kanë vdekur në trazirat e fundit, kur qeveria tha se do të lironte një pjesë të burgosurve për shkak të koronavirusit.
Kreu i Organizatës së Burgjeve të Iranit, Asghar Jahangir tha se më shumë se 100,000 të burgosur janë liruar me kusht.
Gjithsesi, sipas France24 vetëm një pjesë e vogël e të burgosurve në dy burgjet e Ahvazit janë liruar sepse shumica nuk mund të përballonin çmimet e larta të lirimit me kusht.
Deri më tani në Iran numri total i të prekurve nga koronavirusi ka shkuar në 60.500 ndërsa kanë vdekur 3,739 persona. Sa i përket të burgosurve sipas burimeve zyrtare, nuk ka të vdekur nga Covid-19 brenda burgjeve. Por aktivistët thonë se të paktën 10 të burgosur kanë vdekur nga koronavirusi.
