Një grup prej 21 eurodeputetësh i dërguan një letër Komisionerit Evropian për Fqinjësi dhe Zgjerim, Olivér Várhelyi, në të cilën flasin për situatën “jashtëzakonisht të rëndë” në Serbi në lidhje me të drejtat kushtetuese dhe të njeriut.
Eurodeputetët shprehen se gjendja e jashtëzakonshme e imponuar nga Presidenti Aleksandar Vuçiç për të trajtuar pandeminë e koronavirusit është një masë “e rëndë dhe disproporcionuese” që kufizon të drejtat e njeriut, me sa duket jo për të parandaluar përhapjen e COVID-19, por për të penguar lirinë e shprehjes dhe lëvizjes së lirë.
“Rezultati i kësaj është që disa qytetarë janë arrestuar për shkelje të dispozitave të rrepta të kufirit, ndërsa arsyeja e vërtetë e arrestimeve të tyre ishte kritika ndaj politikave qeveritare”, thuhet në letër, ndërkohë që theksohet se qeveria serbe “dëshiron kontroll të plotë mbi shtypin, për të transmetuar vetëm informacione të filtruara, kryesisht të rreme dhe shpifje kundër Bashkimit Evropian “, dhe se po përdor pretekste për të arrestuar gazetarët.
Deputetët e Parlamentit Evropian shprehen gjithashtu se vendosja e ushtrisë në spitale është “një masë e pajtueshme me një gjendje lufte, sesa me një pandemi” dhe shprehen të shqetësuar për faktin se “vendosja e gjendjes së jashtëzakonshme ndodhi në mungesë të një seance parlamentare”.
Kjo është arsyeja pse grupi prej 21 eurodeputetësh nga grupe të ndryshme parlamentare i kërkojnë Komisionerit të Zgjerimit të BE-së të bëjë një deklaratë të qartë për zhvillimet e brendshme “jashtëzakonisht serioze” dhe deklaratat kundër BE-së, si dhe ato që Brukseli mund të bëjë posaçërisht për t’u marrë me “masat ekstreme” të Qeverisë së Serbisë.
Në letër kërkohet edhe përcaktimi nga Komisioni i Zgjerimit mbi hapat penalizuese që do merren ndaj procesit integrues të Serbisë, në rast se qeveria atje vijon shkeljen e të drejtave të njeriut.
