Nuk mund të shuash zjarrin nëse nuk di ku është vatra. Ky është krahasimi që Lulzim Basha, kryetar i Partisë Demokratike, bën për situatën ku ndodhet vendi në përballjen me koronavirusin. Kryeopozitari ka theksuar sot se Shqipëria ka nevojë për një strategji të re për të dalë nga izolimi, por kjo nuk mund të arrihet me këtë numër të vogël testimesh që po kryhen.
“Shqipërisë i duhet një numër shumë më i madh testimesh. I duhet një strategji e re. Nuk mund të dalësh nga një zjarr i madh me sy të mbyllur dhe pa e ditur ku janë vatrat e zjarrit. Hapi i parë i planit të daljes nga situata është rritja e numrit të testimeve”, deklaroi Basha.
Sipas Bashës, është e pamundur që njerëzit të mbahen në shtëpi pa plan dhe është e pamundur të kemi një plan me nivelin aktual të testimeve.
“Kjo përbën një pengesë për qeverinë që të hartojë një plan për daljen nga situata”, shtoi ai.
Basha tha se spekulimi që po bëhet do na kushtojë jetë, shëndet dhe ekonomi.
