Ishin takimet me bashkëshorten që e çuan në pranga llir Selmanin, një prej të akuzuarve për vrasjen e ish-policit Santiago Malko 8 muaj më parë, jo shume larg vendit ku u arrestua 35-vjeçari.
Burime për Faxweb pranë uniformave blu bëjnë me dije se agjentët e policisë e mbanin nën vëzhgim prej kohësh familjen e tij, në përpjekje për të zbuluar se ku fshihej.
Disa vizita të bashkëshortes në një pallat në rrugën “Endri Keko”, në zonën e Xhamllikut, shtuan dyshimet e policisë.
Pas disa ditësh nën vëzhgim, ata u siguruan për praninë e tij dhe pritën momentin që të dilte nga banesa.
Ilir Selmani sapo kishte dalë dhe mbante me vete një pistoletë me fishekë në gojë.
Në polici mësohet se ai ka mohuar pjesëmarrjen në vrasjen e ish-efektivit të policisë. Ka pranuar njohjen me Leonard Dukën, i dyshuari kryesor për vrasjen, por tha se s’kishte gisht në ngjarjen e ndodhur mbrëmjen e 27 Gushtit në rrugën “Xhanfize Keko”.
Për pistoletën tha se e mbante me vete për vetëmbrojtje, pasi ndihej i kërcënuar nga një grup kriminal rival, që sipas tij vepron në kryeqytet.
Por dëshmia e tij nuk i ka bindur hetuesit. Prokuroria thotë se ka prova të pakundërshtueshme kundër tij. Për vrasjen e ish- policit, në kërkim vijojnë të jenë edhe 7 persona të tjerë, mes tyre edhe vëllezërit Leonard dhe Erlis Duka. I arrestuar është edhe Blendi Teta, që akuzohet për moskallëzim krimi./Faxweb
