Ekspertë të ndryshëm kanë paralajmëruar njerëzit se pandemia e koronavirusit mund të ketë një ndikim të madh në shëndetin mendor.
Sipas tyre frika nga koronavirusi mund të çojë në sëmundjen e shëndetit mendor, në një kohë që miliarda njerëz luftojnë për të përballuar jetesën në izolim dhe momentet e ankthit.
Në një punim shkencor të botuar në Lancet Psychiatry, 24 specialistë kanë bërë apel mbi ndikimin negativ që mund të ketë për shëndetin mendor të njerëzve.
Ndërkaq, dy sondazhe të realizuara në Britaninë e Madhe, treguan se shumica e njerëzve të anketuar kishin përjetuar ankth dhe frikë të përkeqësimit të shëndetit mendor, që nga momenti i shpërthimit të koronavirusit, shkruan “The Ecologist” duke iu referuar botimit të Lancet Psychiatry.
‘Si rezultatit i koronavirusit, ne të gjithë po përballemi me një pasiguri dhe ndryshime të mëdha në mënyrën e jetesës,’– tha Emily Holmes nga departamenti i psikologjisë i Universitetit Uppsala.
“Sondazhet tona tregojnë se këto ndryshime tashmë kanë një ndikim të konsiderueshëm në shëndetin tonë mendor.”
Studimet mbi ndikimin e shëndetit mendor nga shpërthimet e mëparshme të sëmundjeve, të tilla si SARS në fillim të viteve 2000, treguan një rritje të rasteve të vetëvrasjeve dhe numrit të punonjësve të kujdesit shëndetësor me shqetësime emocionale.
