Dy nenet e ndryshimit në kod që kërkojnë burgosjen e përhapësve të sëmundjes! Ku dhe si gabuan hartuesit e akteve. Flasin avokatët e njohur, Sokol Hazizaj dhe Ledio Braho!
Nga Nikoleta Kovaçi/
Si një nismë deputetësh dhe jo qeverie mori udhën një draft propozim për ndërhyrjen në Kodin Penal. Ishin deputetët e Partisë Socialistë që hartuan disa akte dhe më pas ia nisën Kuvendit. Por në momentin kur këto akte që kishin të bënin me ndryshimet në Kodin Penal zgjuan reagime të shumta sidomos nga ana e juristëve dhe të ekspertëve. Po ashtu edhe të opozitës bashkë institucionet që kanë funksione juridike. Sipas tyre, ndërhyrjet në Kodi Penal ishin tërësisht antikushtetuese, ndërsa në fakt Kuvendi i miratoi sigurisht që më votat e mazhorancës.
Gjithçka nisi konkretisht teksa në drafte propozohej burg deri në 10 vjet. Kjo ishte masa e dënimit sipas hartuesve që dolën nga mazhoranca për të gjithë ata që shkelin urdhrin e karantinës. Në rast të cenimit të jetës së qytetarëve, dënimi shkon deri në 15 vjet burg. Drafti që ka shkuar në Kuvend, si nismë deputetësh dhe jo e Qeverisë, kërkohet të shtohen dy nene në Kodin Penal. Në fakt ishin nisur tre. Një prej tyre është shkelja e rregullave të karantinës për parandalimin e përhapjes së sëmundjes infektive që lidhej me moszbatimi i urdhrit të karantinës apo shkelja e rregullave të karantinës. Kjo i adresohej një personi mbartës ose jo i sëmundjes infektive ngjitëse, që sipas hartuesve përbën vepër penale dhe sërish sipas tyre duhet të dënohet me gjobë dhe me burgim deri në dhjetë vjet. Madje ndëshkimi sipas tyre, nëse do kishte pasoja edhe më të rënda, paçka se nuk përcaktohet se kush e mat këtë pasojë, dënimi të shkonte deri në 15 vite.
Po ashtu hartues-propozuesit kërkuan që në Kodin Penal të shtohej edhe një nen që ndëshkon nga gjobë deri në disa muaj burg, të gjithë ata që nuk i binden masave të autoriteteve, gjatë gjendjes së jashtëzakonshme ose gjendjes së fatkeqësisë natyrore. Dënimi me burg rritet kur kemi të bëjmë me përsëritës dhe ata që rrezikojnë jetën e qytetarëve.
Reagimet
Në lidhje me këto ndërhyrje në Kodin Penal ka patur reagime të shumta të njerëzve të fushës. “Fjala” bisedoi me dy juristë të njohur dhe mjaft aktiv që kur u propozuan këto ndërhyrje. Është avokati dhe juristi i njohur Sokol Hazizaj, i cili e ka përmbledhur në katër pika reagimin e tij për këtë ndërhyrje në Kod. Sipas tij akti është i gjithi antikushtetues, duke hequr paralele me veprime të njëjta me kohën e diktaturës. Ai ndalohet edhe tek vetë mekanizmi i formatimit të ligjeve me karakter të përhershëm në një gjendje të përkoheshme, ndërkohë që Hazizaj ka kritika edhe për kuptimin formal të akteve. Ai e bazon në katër pika reagimin e tij:
“1. Në historinë e njerëzimit, është hera e parë që formatohen ligje me karakter të përhershëm në gjendje të perkohshme, dmth jo propocional;
- Është tërësisht antikushtetuese, shiko nenin 27/2 të Kushtetutës. Formulimi i ndryshimeve të Kodit Penal të kujton vendosjen me ligj të urdhërave të merhumit;
- Në kuptimin formal dhe ligjor lë për të dëshiruar sa i përket dhe identifikimit të individit, mënyrës së identifikimit, duke lënë shteg të hapur për burg çdo individi të sëmurë ose jo;
- Vjen në kundërshtim me vendimin e Gj. K, nr. 19/2011 etj.”
Gjithashtu për gazetën ‘Fjala’ ka reaguar edhe avokati Ledio Braho i cili nënvizon me detaje shkelje edhe Kushtetute nga ana e hartuesve, po ashtu siç janë shkelur të drejtat e njeriut. Ai ndalohet tek diskutimet dhe ndarjet që janë bërë ne vendet perëndimore në lidhje edhe me sëmundje të tjera infektive si HIV/AIDS, ndërkohë që propozuesit për ndryshimet në Kodin Penal kanë rënë ndesh edhe me një Dokument të Këshillit të Europës, i dalë enkas për këtë periudhë pandemie.
-Komenti i plotë: Qasja e gabuar që ka deformuar strukturën e Kodit Penal
