Presidenti Donald Trump ka vendosur që të pezullojë përkohësisht emigracionin drejt Shteteve të Bashkuara të Amerikës, si masë për t’u mbrojtur nga përhapja e koronavirusit. Vendimin e konfirmoi me anë të një postimi në ‘Twitter’, por pa dhënë më shumë detaje.
“Në dritën e sulmit nga armiku i padukshëm, si dhe nga nevoja për të mbrojtur punët e qytetarëve tanë amerikanë, unë do të nënshkruaj një urdhër ekzekutiv për të pezulluar përkohësisht emigracionin në Shtetet e Bashkuara”, bëri me dije presidenti amerikan.
Është ende e paqartë se çfarë mekanizmi do të përdorë Trump për të pezulluar emigracionin, sa kohë një pezullim i tillë mund të zgjasë ose çfarë efekti do të ketë kjo në funksionimin e vendkalimeve kufitare në SHBA dhe mbi ata që tashmë mbajnë ‘green cards’.
Detaje nuk janë dhënë as për fituesit e vitit të kaluar të lotarisë amerikane, ku procedurat e dhënies së vizës janë pezulluar, përfshirë Ambasadën në Tiranë, për shkak të pandemisë së COVID-19.
