Presidenti Ilir Meta ka vendosur të dekretojë ndryshimet në Kodin Penal, ku parashikohet burg për ata që shkelin karantinën. Në një dalje për mediat, Meta tha shpallja e ligjit u vlerësua e nevojshme në situatën pandemike që po kalon vendi ynë, për arsye se kohëzgjatja, pasojat, apo mundësia e ripërsëritjes së një situate të tillë, mbeten ende të paparashikueshme.
“Nisur nga këto zhvillime, nga kjo gjendje e fatkeqësisë natyrore në të cilën ndodhemi, por mbi të gjitha, për shkak të boshllëkut ligjor që ka Kodi Penal sa i përket trajtimit të veprimeve që kryhen me dashje dhe qëllimin kriminal për përhapjen e sëmundjeve infektive, Presidenti vlerëson se iniciativa e Kuvendit dhe Qeverisë që mbrojtja e shëndetit publik të garantohet edhe nga normat penale, përpos atyre administrative, duhet mbështetur”, theksoi Meta.
Gjithsesi, Presidenti kërkoi që në raste shkeljesh të tregohet kujdes dhe se personi që ka kryer shkeljen fillimisht duhet të dënohet me gjobë.
Në ndryshimet e reja parashikohet se, nëse një qytetar ndaj të cilit është dhënë më parë gjobë dhe përbën kundravajtje, atëhere dënohet me gjobë ose deri në 6 muaj burg.
Kur kundravajtja është kryer në ushtrim të akvititetit tregtar dhe rrezikon shëndetin e njerëzve dënohet me gjobë ose 2 vjet burg.
Përhapja me dashje e sëmundje infektive dënohet me 2-5 vite burg.
Përhapja nga pakujdesia e sëmundjes infektive dënohet me gjobë ose 2 vite burg
Kur përhapja e sëmundjes infektive ka lënë pasoja të rrezikshme për jetën e njerëzve dënohet me 3-8 vite burg.
