Tregtarët e Tregut Industrial në qytetin e Beratit protestuan ditën e sotme përpara baskisë, duke kërkuar pagën e luftës.
Përpara institucionit në fjalë ishin mbledhur rreth 30 qytetarë, të cilët pretendojnë se nuk kanë përfituar asnjë mbështetje financiare nga qeveria, edhe pse Tregu Industrial në Berat është mbyllur që në 12 Mars.
Ata kanë thënë se edhe pse kanë aplikuar, nuk janë përfshirë në bizneset që marrin pagën e luftës, sepse janë tregtarë ambulantë.
Më tej tregtarët kanë theksuar se prej vitesh paguajnë rregullisht taksat dhe sigurimet dhe si një biznes familjar është i vetmi burim jetese që ata kanë.
“Ne jemi të falimentuar”, thanë tregtarët që tashmë kërkojnë hapjen e menjëhershme të tregut për të filluar punën.
Ata po presin të zhvillojnë një takimi me përfaqësues të Bashkisë, për të gjetur një zgjidhje për hapjen e Tregut Industrial dhe rifillimin e punës./Fjala.al/
