Irani ka njoftuar se ka lëshuar me sukses satelitin e parë ushtarak të vendit pas disa muajsh dështimesh, një program që Shtetet e Bashkuara pretendojnë se është një mbulesë për zhvillimin e raketave, dhe kjo gjë mund të rrisë tensionet midis tyre.
“Sateliti i parë i Republikës Islamike të Iranit është nisur me sukses në orbitë nga Trupat e Gardës Revolucionare Islamike [IRGC]”, shkruhej në faqen zyrtare të forcave elitare të mërkurën.
Sateliti është quajtur “Noor” – që do të thotë “dritë” – dhe u përdor një transportues satelitor Ghasad për ta hedhur në hapësirë, një sistem që më parë ishte i panjohur. Lëshimi i tij u bë në shkretëtirën Markazi.
Sateliti “është vendosur 425km në orbitën e Tokës”, shkruhej në faqe. “Ky veprim do të jetë një sukses i madh dhe një zhvillim i ri në fushën e hapësirës për Iranin Islamik”.
IRGC e quajti atë satelitin e parë ushtarak të lëshuar ndonjëherë nga Teherani.
Ndërsa bota merret me pandeminë e koronavirusit dhe çmimet historikisht të ulëta të naftës, lëshimi i raketave mund të sinjalizojë se rreziqe të tjera do të vinë nga Irani.
“Kjo ngre shumë flamuj të kuq”, tha Fabian Hinz, një studiues në James Martin Center.
Hinz tha, bazuar në imazhet e mediave shtetërore, lëshimi duket se ka ndodhur në një bazë IRGC të paemërtuar më parë pranë Shahroud, Iran, rreth 330 km (205 milje) në veri-lindje të Teheranit. Baza është në provincën Semnan nga e cila operon programi hapësinor civil i Iranit./Burimi:Aljazeera Përshtati: Fjala.al
